Blog

Êrîşên li hember Rojava li paytext Londonê hatin şermezar kirin. Di çalakiya li pêşiya serokwezereta Îngîlîstanê hatî kirin de bi sedan kes got “Kobanê ne bi tenê ye” û piştgiriya xwe jibo Kobanê nîşandan.

Ev demeke çeteyên  girêdayî El–kaîde DAIŞ êrîşên hovane li hember derdora Kobanê dikin. Jiber van êrîşên li hember qantona Kobanê gelek rêxistinên kurd banga piştgiriyê kiribûn. Tevî gelek bajarên Ewrûpa roja Sêşemê li paytext Londonê jî çalakiyek girseyî hat lidarxistin. Çalakiya ku bi pêşengiya Meclîsa Gelê Kurd ya Brîtan ya hatî kirin gelek rêxistinên li Londonê tevlî bûn.

Di çalakiyê de gelek axaftin hatin kirin û di derbarê êrîşên li hember Kobanê belavok hatin  belav kirin. Di axaftinên hatîn kirin de hat gotin ku Rojava ne bitenê ye û dê piştgiriya wan bi Rojava re berdewam bike. Di axaftinan de wiha hat gotin: “ Ev çar hefteye çeteyên girêdayî El–Kaîde êrîşî qantona Kobanê dikin. Çeteya DAIŞê li heremên wek Raqqa û Tel abyad gelek Kurd, Ermenî û Elewî koçber kirin. Dewletên hawîrdor wek Tirkiye alîkariya van çeteyan dikin û çekan didin çeteyan. Jiber ku ev dewlet ji awakirina van qantonan ne kêfxweşin û dixwazin van deskeftiyan sabote bikin û alozî li Rojava derxin”.

Wekî din hat xwestin ku hêzên demokratîk raya giştî li hember van êrîşan derkeve û dewletên ku alîkariyê didin van çeteyan dest ji alîkariyê berdin.

Girseya li hember avahiya serokwezareta Îngîlîz çalakiya xwe li dar xistî bê navber dirûşmên wek “Kobanê ne bi tenê ye” û “Bijî berxwedana Kobanê”   qêriyan. Di çalakiyê de alên PKK, Qantonên Rojava, Pjak, YPG û PYD hatin rakirin. Piştre girse ji ber bi Wezareta Karên Derve ya Îngîlîstanê ve meşiya.  Girse li pêşiya Wezareta Karên derve bi saetan li benda berpisiyarên wezaretê sekinî da ku dosyaya hatî amade kirin radestî wan bike.

Çalakiya ku bi banga Meclîsa gelê Kurd ya Brîtanya ve hatî kirin gelek rêxistinên sîvîl tevlî bûn. Rêxistinên ku tevlî çalakiyê bûyîn ev in: Federasyona Elewiyan ya Brîtanya–BAF, Partiya Yekîtiya Demokratîk (PYD), Komeleya Çandî ya Karkerên Penaber-GİK-DER, Komeleya Piştevaniya Dersimiyan–Dersim-Der, Navenda Civaka Kurd û Tirk–Day-mer, Komeleya Piştevaniya Kangal û Qoçgiriyan, Navenda Çandî ya Sed Kulîlk Vebe YCKM, Komeleya Piştevaniya Kirkisrakiyan, Navenda Çandê ya Tohûmê, Navenda Civaka Elbîstanê–El-com, Komeleya Piştevaniya Tilkiliyan, Komeleya Piştevaniya Nûrhaqiyan û Tevgera Goran. 

Li paytext Londonê Newroza 2014´an bi tevlîbûneke mezin bi awayekî coş hat pîroz kirin. Roja Yekşemê bi hezaran Kurd û dostên wan li Finsbury parkê kom bûn.

Pîrozbahiya Newrozê bi deqek rêzgirtin destpêkir. Piştî rêzgirtinê girseyê bi yek dengî dirûşmeya ´şehîd namirin´ qêriyan. Di pîrozbahiyê de li ser navê Meclîsa gelê Kurd ya Brîtanya, Yekîtiya Hêza Demokratîk, Partiya Goran, PÇDK û MLKP axaftin hatin kirin. Di axaftinên hatîn kirin de bi piranî bal kişandin ser pirsgirêka Kurdan û hat gotin ku Kurd nema bindestiyê qebûl dikin.

Di pîrozbahiyê de Parlementera partiya Aşitî û Demokrasiyê ya Îdirê Perwîn Buldan jî axaftinek kir. Buldan bal kişand ser pêvajoya dawî û da zanîn ku di vê pêvajoyê de hikûmeta tirk berpirsiyariyên xwe nayêne cih û pêvajoyê dixe xetereyê. Buldan axaftina xwe wisa berdewam kir: “Ev salek di ser pêvajoya ku ji hêla rêberê gelê Kurd Abdullah Ocalan re hatî destpê kirin derbasbûye, Lê hîna hikûmeta AKP´ê tu gavên berbiçav neavêtine û şens nade aşitiyê”.

Buldan bal kişand ser hilbijartinên roja Yekşemê û wek ezmûneke dîrokî bi nav kir. Buldan wiha got: “Di hilbijartinên herêmî de her ray û her şaredariya bê bi dest xistin dê gelê Kurd gavekî bêhtir nêzî aşitî û azadiyê bike. 30 Adarê jibo me referandûm e, ef refarandûm dê pêşeroja Kurdan nîşan bide. Vê hilbijartinê em ê bi sitandina Qers, Agirî, Mûş, Bitlîs û Rihayê şoreşê pêk bînin.

Parlementer Buldan bang li Kurdên Ewrûpa jî kir ku di hilbijartinên herêmî de alîkariya BDP û HDP bikin. Buldan wisa axivî: “Daxwaza me ji gelê me yê Ewrûpa ew e ku jibo hilbijartinê piştgiriya xwe bi partiya wan re nîşan bidin û bi nasên xwe yên li welat re bikevin têkiliyê û piştgiriya BDP û HDP ji wan bixwazin”.

Li ser navê Yekîtiya Hêza Demokratîk ya ku gelek rêxistinên demokratîk di nav de cih digirin axaftinek hat kirin. Di axaftinê de girîngiya yekîtiya hêzên demokratîk hat kirin. Axaftin wisa berdewam kir: “Ji roja ku dewleta Tirk hatî damezrandin heta îro polîtîkayên yek ziman, yek netew, yek ol êşên mezin bi gelê me dane jiyandin. Hikûmeta AKPê mecbûr ma ku bi rêberê PKK Abdullah Ocalan re dest bi hevdîtinan bike, lê heta niha tu gav nehatine avêtin. Divê bersiva vê yekê di hilbijartinên herêmî de were dan”.

Wekî din di pîrozbahiya Newrozê de parlementer Jeremy Corbyn, Şaredarê Enfildê Doug Taylor, endamê partiya kesk Shahrar Ali, endamê partiya demokratên liberal Jonathan Fryer, serokê komisyona adalet û aşitiyê Father Joe Ryan û Profesor Mary Davis jî axivîn. Axaftvanan bi kurdî Newroz pîroz kirin û piştevaniya xwe bi gelê Kurd re diyar kirin.

Di pîrozabahiyê de hûnermendên wek Kawa, Meral Tekçi, Jala, Koma Sersî, Erkan Baydar û Ali Ihsan Dogan derketin ser dikê û sitranên xwe pêşkêş kirin. Qoroya Zarokan û Govenda jinan jî di bernamê de cihê xwe girtin.

Li gorî komîteya amadekar hejmara kesên tevlî bernamê bûyî ji 5 hezaran derbas kir. Pîrozbahî heta saet heftê êvarî bi coş berdewam kir.

Jibona cejna Newrozê bi malavaniya parlmenterê partiya Sinn Fein Paul Maskey li parlemena Îngîltere resepsiyonek hat li dar xistin. Resepsiyon roja Pêncşemê li odeya MacMillan hat kirin. Lord Hylton jî yek ji mêvanên resepsiyonê bû.

Di resepsiyona Newrozê de gelek axaftin hatin kirin û cejna Newrozê hat pîroz kirin. Di dawiya axaftinan de li ber defê govend hat gerandin.

Platforma yekîtiya hêza demokratîk ya Brîtanya jibo pîrozbahiya Newrozê meşek li dar xistin. Meş ji îstasyona Manor Housê dest pê kir û li îstasyona Turnpike Lane bi dawî bû. Tevî nûnerên gelek rêxistinên sîvîl bi sedan kes tevlî meşê bûn.

Di meşê de bênavber dirûşmên wek “Bîjî Newroz”, “Bîjî biratiya gelan” hatin qêrîn. Her rêxistin bi al û pankartên xwe tevlî meşê bû û pankartek li ser navê hemû rêxistinan, bi sê zimanan li ser “Bîjî Newroz” nivîsandî li pêşiya meşê hat rakirin.

Di dawiya meşê de li ser navê hemû rêxistinan daxûyaniya hatî amade kirin hat xwendin. Di daxûyaniyê de Newroz hat pîroz kirin û duvre girîngiya hilbijartinên 30 Adarê hat diyar kirin. Di daxûyaniyê de wiha hat gotin; “Her kesê ku ji partiya AKP cûda difikire bi zilm û zordariyê re rû bir û dimîne”.

Di dawiya daxûyaniyê de piştgirî jibo HDP di hilbijartinan de hat xwestin.

Rêxistinên di bin banê Platforma Yekîtiya Hêza Demokratîk ev in: Meclîsa Gelê Kurd Ya Brîtanya, Federasyona Elewiyan ya Brîtanya–BAF, Komeleya Çandî ya Karkerên Penaber-GİK-DER , Komeleya Piştevaniya Dersimiyan–Dersim-Der, Navenda Civaka Kurd û Tirk–Day-mer, Komeleya Piştevaniya Kangal û Qoçgiriyan, Navenda Çandî ya Sed Kulîlk Vebe YCKM, Komeleya Piştevaniya Kirkisrakiyan, Navenda Çandê ya Tohûmê, Navenda Civaka Elbîstanê–El-com, Komeleya Pazarcixiyan–Paz-Der, Komeleya Piştevaniya Tilkiliyan, Komeleya Piştevaniya Nûrhaqiyan.